Manuel Frade Rojí naceu en Baracaldo (Biscaia) o 24-02-1907. Moi cedo a súa familia veu a Ferrol e o xoven Manolín empezaría na nosa cidade a dar patadas a un balón na demarcación de defensa dereito. Xogou no Fortuna ferrolán en 1923/24 e de aí pasou ao Racing, onde permaneceu entre as campañas 1924/25 e 1931/32. Debutou en competición oficial co cadro verde o 23 de novembro de 1924 nun partido do campionato galego diante do Unión Sp. olívico e dende entón faría do seu eterno sorriso e do pano branco na fronte ou no pescozo elementos inconfundibles da súa imaxe.  Non tardou nada en erixirse nun fixo incuestionable na defensa racinguista xunto a Francisco Cobelo. Dende 1926/27 o seu compañeiro nesa tarefa pasou a ser Alejandro, moito máis veterano ca el pero co que se compenetrou perfectamente. Cando o rioxano causou baixa, foi o carballés Benito Pérez “Moreno” o novo compañeiro de Manolín nos labores de retagarda. 

Con todos eles Manolín deu a talla, aportando as súas cualidades de defensor áxil, rápido, impetuoso, moi brillante nos despexes de cabeza e elegante na concepción do xogo. Constituia un futbolista ordenado, de estilo fino, de fútbol alegre e eficiente, combativo e intelixente, sen brusquedades, ideal para un compañeiro de retagarda que tivese na técnica a súa principal virtude.

 

O de Baracaldo foi outro dos “Diaños Verdes” salientables, indiscutible xogador do Racing de finais da década de 1921-30 e comezos da seguinte, pretendido por D. La Coruña e Alavés logo da excelente temporada na que o equipo ferrolán se proclamara campión galego invito e caera ante o Ath. Bilbao nos oitavos de final da Copa do Rei.
No seu tempo foi un dos mellores defensas de Galicia xunto ao deportivista Otero, o céltico Pasarín ou o seu compañeiro racinguista Alejandro e integrou o once da selección galega en senllos partidos ante o combinado rexional do Centro e o D. La Coruña no ano 1929. No primeiro deses choques fixo parella na retagarda con Pasarín.

Xogador moi querido pola afección do Inferniño, afeita naqueles anos a ver excelentes futbolistas, Manolín sempre foi lembrado como un auténtico ídolo, como un dos referentes de toda unha época. Por iso, en 1967, o clube verde concedeulle a Insignia de Ouro nos prolegómenos da final do trofeo “Concepción Arenal” (que disputou o equipo verde contra o Celta).
Manolín Frade faleceu en Ferrol o 23-11-1979. Íase un dos mellores defensas da  historia verde. Un dos que fixeron grande ao Racing nos terreos de xogo e nas memorias deportivas.